Terjemahan makna Surah Surah At-Takwīr - Terjemahan Berbahasa Hausa - Abu Bakar Jomy - Ensiklopedia Alquran Alkarim

Suratu Al'takweer

Ayah: 1

إِذَا ٱلشَّمۡسُ كُوِّرَتۡ

Idan rãna aka shafe haskenta

Ayah: 2

وَإِذَا ٱلنُّجُومُ ٱنكَدَرَتۡ

Kuma idan taurãri suka gurɓãce (wani ya shiga a cikin wani).

Ayah: 3

وَإِذَا ٱلۡجِبَالُ سُيِّرَتۡ

Kuma idan duwãtsu aka tafiyar da su.

Ayah: 4

وَإِذَا ٱلۡعِشَارُ عُطِّلَتۡ

Kuma idan rãƙuma mãsu cikunna* aka sakẽ su wãwai, bã ga kõwa ba.

* Rãƙuma mãsu ciki ɗan wata gõma.

Ayah: 5

وَإِذَا ٱلۡوُحُوشُ حُشِرَتۡ

Kuma idan dabbõbin dãji aka tattara su.

Ayah: 6

وَإِذَا ٱلۡبِحَارُ سُجِّرَتۡ

Kuma idan tẽkuna aka mayar da su wuta.

Ayah: 7

وَإِذَا ٱلنُّفُوسُ زُوِّجَتۡ

Kuma idan rãyuka aka haɗa* su da jikunkunansu.

* Ko kuma, aka haɗa kõwane mutum da irin mutãnensa a Aljanna ko a wuta.

Ayah: 8

وَإِذَا ٱلۡمَوۡءُۥدَةُ سُئِلَتۡ

Kuma idan wadda aka turbuɗe* ta da rai aka tambaye ta.

* A cikin zãmanin jahiliyya Lãrabãwa bã su son a haifa musu 'ya'ya mãta dõmin haka har sukan turbuɗe 'ya'yansu dõmin kada su yi abin kunya ko kuma su talauce wajen yi musu aure.

Ayah: 9

بِأَيِّ ذَنۢبٖ قُتِلَتۡ

"Sabõda wane laifi ne aka kashe ta?"

Ayah: 10

وَإِذَا ٱلصُّحُفُ نُشِرَتۡ

Idan takardun ayyuka aka wãtsa su (ga mãsu su).

Ayah: 11

وَإِذَا ٱلسَّمَآءُ كُشِطَتۡ

Kuma idan sama aka fẽɗe ta.

Ayah: 12

وَإِذَا ٱلۡجَحِيمُ سُعِّرَتۡ

Kuma idan Jahĩm aka hũra ta

Ayah: 13

وَإِذَا ٱلۡجَنَّةُ أُزۡلِفَتۡ

Kuma idan Aljanna aka kusantar da ita.

Ayah: 14

عَلِمَتۡ نَفۡسٞ مَّآ أَحۡضَرَتۡ

Rai ya san abin da ya halartar (a rãnar nan).

Ayah: 15

فَلَآ أُقۡسِمُ بِٱلۡخُنَّسِ

To, ba sai Na yi rantsuwa da taurãri matafã* ba.

* Masu tafiya suna kõmawa bãya.

Ayah: 16

ٱلۡجَوَارِ ٱلۡكُنَّسِ

Mãsu gudu suna ɓũya.

Ayah: 17

وَٱلَّيۡلِ إِذَا عَسۡعَسَ

Da dare idan ya bãyar da bãya.

Ayah: 18

وَٱلصُّبۡحِ إِذَا تَنَفَّسَ

Da sãfiya idan ta yi lumfashi.

Ayah: 19

إِنَّهُۥ لَقَوۡلُ رَسُولٖ كَرِيمٖ

Lalle ne shi (Alƙur'ãni) haƙƙan, maganar wani manzon (Allah) ne mai girma ga Allah.

Ayah: 20

ذِي قُوَّةٍ عِندَ ذِي ٱلۡعَرۡشِ مَكِينٖ

Mai ƙarfi, mai daraja a wurin Mai Al'arshi.

Ayah: 21

مُّطَاعٖ ثَمَّ أَمِينٖ

Wanda ake yi wa ɗã'a (wato shugaban malã'iku) ne a can, amintacce.

Ayah: 22

وَمَا صَاحِبُكُم بِمَجۡنُونٖ

Kuma abokinku ba mahaukaci ba ne.

Ayah: 23

وَلَقَدۡ رَءَاهُ بِٱلۡأُفُقِ ٱلۡمُبِينِ

Kuma lalle ne, yã gan shi* a cikin sararin sama mabayyani.

* Annabi ya ga Mala'ika Jibirilu ya san shi. Sabõda haka wani aljani bã zai yi kama da shi ba balle ya kãwo masa ƙarya.

Ayah: 24

وَمَا هُوَ عَلَى ٱلۡغَيۡبِ بِضَنِينٖ

Kuma shi, ga gaibi* bã mai rowa ba ne.

* Ma'anar gaibi a nan, ilmin da Allah Ya aiko Jibirilu da shi zuwa ga Annabi Annabi ba ya ɓõye shi daga mutãne. Ga wata ƙira'a, wanda ake tuhuma, wãto ba a tuhumar Annabi, ga gaibin da ya faɗi cewa daga Allah yake, wato Alƙur'ãni duka gaskiya ne.

Ayah: 25

وَمَا هُوَ بِقَوۡلِ شَيۡطَٰنٖ رَّجِيمٖ

Kuma shi (Alƙur'ani) bã maganar shaiɗani, wanda aka la'ana, ba ce.

Ayah: 26

فَأَيۡنَ تَذۡهَبُونَ

Shin, a inã zã ku tafi?

Ayah: 27

إِنۡ هُوَ إِلَّا ذِكۡرٞ لِّلۡعَٰلَمِينَ

Lalle ne shi (Alƙur'ãni), bã kõme ba ne fãce gargaɗi ga talikai.

Ayah: 28

لِمَن شَآءَ مِنكُمۡ أَن يَسۡتَقِيمَ

Ga wanda ya so, daga cikinku, ya shiryu.

Ayah: 29

وَمَا تَشَآءُونَ إِلَّآ أَن يَشَآءَ ٱللَّهُ رَبُّ ٱلۡعَٰلَمِينَ

Kuma bã zã ku so ba sai idan Allah Ubangijin halitta Yã yarda.