மொழிபெயர்ப்பு அத்தியாயம் ஸூரா அத்தாரிக் - தமிழ் மொழிபெயர்ப்பு - உமர் ஷரீப் - அல்குர்ஆன் கலைக்களஞ்சியம்

ஸூரா அத்தாரிக்

வசனம்: 1

وَالسَّمَآءِ وَالطَّارِقِ ۟ۙ

வானத்தின் மீது சத்தியமாக! தாரிக் (-இரவில் தோன்றி பகலில் மறையும் நட்சத்திரங்கள்) மீது சத்தியமாக!

வசனம்: 2

وَمَاۤ اَدْرٰىكَ مَا الطَّارِقُ ۟ۙ

(நபியே!) தாரிக் என்னவென்று உமக்கு அறிவித்தது எது?

வசனம்: 3

النَّجْمُ الثَّاقِبُ ۟ۙ

(அது) மின்னக்கூடிய பிரகாசிக்கக்கூடிய நட்சத்திரமாகும்.

வசனம்: 4

اِنْ كُلُّ نَفْسٍ لَّمَّا عَلَیْهَا حَافِظٌ ۟ؕ

ஒவ்வோர் ஆன்மாவும் இல்லை, அதன் மீது (அதன் செயலை கண்காணிக்கிற) ஒரு காவலர் இருந்தே தவிர.

வசனம்: 5

فَلْیَنْظُرِ الْاِنْسَانُ مِمَّ خُلِقَ ۟ؕ

ஆக, மனிதன், அவன் எதிலிருந்து படைக்கப்பட்டான் எனப் பார்க்கட்டும்.

வசனம்: 6

خُلِقَ مِنْ مَّآءٍ دَافِقٍ ۟ۙ

வேகமாக ஊற்றப்படக்கூடிய (இந்திரியம் எனும்) தண்ணீரிலிருந்து படைக்கப்பட்டான்.

வசனம்: 7

یَّخْرُجُ مِنْ بَیْنِ الصُّلْبِ وَالتَّرَآىِٕبِ ۟ؕ

அது முதுகந்தண்டுக்கும் நெஞ்செலும்புகளுக்கும் மத்தியிலிருந்து வெளியேறுகிறது.

வசனம்: 8

اِنَّهٗ عَلٰی رَجْعِهٖ لَقَادِرٌ ۟ؕ

நிச்சயமாக அவன், அவனை மீண்டும் படைப்பதற்கு ஆற்றல்மிக்கவன் ஆவான்,

வசனம்: 9

یَوْمَ تُبْلَی السَّرَآىِٕرُ ۟ۙ

இரகசியங்கள் சோதிக்கப்படுகிற (பகிரங்கப்படுத்தப்படுகிற) நாளில்.

வசனம்: 10

فَمَا لَهٗ مِنْ قُوَّةٍ وَّلَا نَاصِرٍ ۟ؕ

ஆக, அவனுக்கு (-மனிதனுக்கு) சக்தி ஏதும் இருக்காது; உதவியாளர் யாரும் இருக்க மாட்டார்.

வசனம்: 11

وَالسَّمَآءِ ذَاتِ الرَّجْعِ ۟ۙ

(மீண்டும் மீண்டும்) மழையை பொழியக்கூடிய வானத்தின் மீது சத்தியமாக!

வசனம்: 12

وَالْاَرْضِ ذَاتِ الصَّدْعِ ۟ۙ

தாவரங்களை முளைக்க செய்கிற பூமியின் மீது சத்தியமாக!

வசனம்: 13

اِنَّهٗ لَقَوْلٌ فَصْلٌ ۟ۙ

நிச்சயமாக இது (நன்மை தீமையைப்) பிரித்தறிவிக்கக்கூடிய வேதமாகும்.

வசனம்: 14

وَّمَا هُوَ بِالْهَزْلِ ۟ؕ

இது, விளையாட்டு அல்ல. (-பொய்யான, கேலியான பேச்சல்ல).

வசனம்: 15

اِنَّهُمْ یَكِیْدُوْنَ كَیْدًا ۟ۙ

நிச்சயமாக அவர்கள் சூழ்ச்சி செய்கிறார்கள்.

வசனம்: 16

وَّاَكِیْدُ كَیْدًا ۟ۚۖ

நானும் சூழ்ச்சி செய்கிறேன்.

வசனம்: 17

فَمَهِّلِ الْكٰفِرِیْنَ اَمْهِلْهُمْ رُوَیْدًا ۟۠

ஆக, நிராகரிப்பாளர்களுக்கு அவகாசமளிப்பீராக! அவர்களுக்கு சிறிது காலம் அவகாசமளிப்பீராக!