Prijevod značenja Ajet 3 Sura Sura en-Nur - Prijevod na joruba jezik - Enciklopedija Kur'ana

Ajet: 3

ٱلزَّانِي لَا يَنكِحُ إِلَّا زَانِيَةً أَوۡ مُشۡرِكَةٗ وَٱلزَّانِيَةُ لَا يَنكِحُهَآ إِلَّا زَانٍ أَوۡ مُشۡرِكٞۚ وَحُرِّمَ ذَٰلِكَ عَلَى ٱلۡمُؤۡمِنِينَ

Onísìná lọ́kùnrin kò níí ṣe sìná pẹ̀lú ẹnì kan bí kò ṣe onísìná lóbìnrin (ẹgbẹ́ rẹ̀) tàbí ọ̀ṣẹbọ lóbìnrin. Onísìná lóbìnrin, ẹnì kan kò níí bá a ṣe sìná bí kò ṣe onísìná lọ́kùnrin (ẹgbẹ́ rẹ̀) tàbí ọ̀ṣẹbọ lọ́kùnrin.¹ A sì ṣe ìyẹn (sìná ṣíṣe) ní èèwọ̀ fún àwọn onígbàgbọ́ òdodo.²

1. Àwọn onímọ̀ pín sí mẹ́ta lórí ìtúmọ̀ āyah yìí nítorí pé, ìtúmọ̀ mẹ́ta tí ó ń padà síbi n̄ǹkan ẹyọ kan ni kalmọh “nikāh” ń túmọ̀ sí nínú al-Ƙur’ān, hadīth àti èdè Lárúbáwá. Àwọn ìtúmọ̀ mẹ́tẹ̀ẹ̀ta náà ni fífẹ́ (ṣíṣe ìgbéyàwó), títi kálámù bọ inú ìgò tàdáà yálà ní ọ̀nà ẹ̀tọ́ tàbí ní ọ̀nà àìtọ́ àti ṣíṣe sìná (àgbèrè). Nítorí náà, ìyapa-ẹnu wà lọ́dọ̀ àwọn onímọ̀ ẹ̀sìn lórí ìtúmọ̀ “lā yankihu” tó jẹyọ nínú āyah yìí. Níwọ̀n ìgbà tí ọ̀rọ̀ sì ti rí bẹ́ẹ̀, ẹnì kan kò gbọ́dọ̀ gbógun ti ẹnì kejì rẹ̀ bí ẹnì kan bá lọ pẹ̀lú ìtúmọ̀ kan nínú àwọn ìtúmọ̀ rẹ̀. Àmọ́ ìtúmọ̀ tí ọ̀gọ̀ọ̀rọ̀ àwọn onímọ̀ ẹ̀sìn dúró lé lórí āyah yìí ni “kò níí ṣe sìná”. Èyí sì ni ìtúmọ̀ rẹ̀ nínú tírà tafsīr Tọbariy, tafsīr Ƙurtubiy, tafsīr Ibn Kathīr àti tafsīr Adwā’ul-bayān. Àlàyé tí wọ́n mú wá lórí èyí ni pé:
Ìkíní: “kò níí ṣe sìná” ni ìtúmọ̀ tí ọmọ ‘Abbās - kí Allāhu yọ́nú sí i - fún gbólóhùn náà, kò sì túmọ̀ rẹ̀ sí “kò níí fẹ́”. Ipò tí ọmọ ‘Abbās sì wà nínú ’Islām lórí ìtúmọ̀ āyah ga tayọ àwọn akẹgbẹ́ rẹ̀.
Ìkejì: Ọ̀ṣẹbọ lọ́kùnrin àti ọ̀ṣẹbọ lóbìnrin tó jẹyọ nínú āyah yìí ti fi hàn pé “kò níí ṣe sìná” ni a máa túmọ̀ “lā yankihu” sí nínú āyah yìí torí pé, kò wúlẹ̀ sí ìgbà kan rí tí Allāhu yọ̀ǹda fún mùsùlùmí láti fẹ́ ọ̀ṣẹbọ lọ́kùnrin àti ọ̀ṣẹbọ lóbìnrin tí ó sì wà ní ipò ọ̀ṣẹbọ.
Nípa bẹ́ẹ̀, àwọn onímọ̀ ẹ̀sìn fi rinlẹ̀ pé, tí ọkọ àti ìyàwó bá wá bá ẹnì kejì rẹ̀ nípò onísìná lẹ́yìn ìgbéyàwó, ìgbéyàwó wọn kò bàjẹ́ àfi tí ẹni tí ọ̀rọ̀ náà bá dùn, tí ó sì pinnu láti lọ fún ìkọ̀sílẹ̀. Àti pé, onísìná lè ti ronú pìwàdà. Bí ó bá sì ti ronú pìwàdà níbi sìná, ó lè fẹ́ ẹni tí kò ṣe sìná rí rárá.
2. Nítorí náà, “ìyẹn” nínú gbólóhùn yìí “A sì ṣe ìyẹn ní èèwọ̀ fún àwọn onígbàgbọ́ òdodo.” ń tọ́ka sí “zinā”. Ìyẹn ni pé, “A sì ṣe zinā ṣíṣe ní èèwọ̀ fún àwọn onígbàgbọ́ òdodo.” Èyí sì ni ìtúmọ̀ rẹ̀ ní ọ̀dọ̀ àwọn onímọ̀ tí ó túmọ̀ “lā yankihu” sí “kò níí ṣe sìná”.