Terjemahan makna Surah Surah Al-Lail - Terjemahan Berbahasa Yau - Ensiklopedia Alquran Alkarim

Al-Lail

Ayah: 1

وَٱلَّيۡلِ إِذَا يَغۡشَىٰ

Nguchilumbila chilo ndema jachikuunichila (chilichose ni chipi chakwe).

Ayah: 2

وَٱلنَّهَارِ إِذَا تَجَلَّىٰ

Ni muusi ndema jakukulanguka.

Ayah: 3

وَمَا خَلَقَ ٱلذَّكَرَ وَٱلۡأُنثَىٰٓ

Ni Ajula (Allah) Jwagumbile chachilume ni chachikongwe.

Ayah: 4

إِنَّ سَعۡيَكُمۡ لَشَتَّىٰ

Chisimu itendo yenu iŵele yakulekangana-lekangana.

Ayah: 5

فَأَمَّا مَنۡ أَعۡطَىٰ وَٱتَّقَىٰ

Sano mundu jwaakutola (petala lya Allah) ni kuŵa niwoga (wakun'jogopa Jwalakwe).

Ayah: 6

وَصَدَّقَ بِٱلۡحُسۡنَىٰ

Ni kulupilila yambone nnope (yatakalipidwe ligongo lyakutola).

Ayah: 7

فَسَنُيَسِّرُهُۥ لِلۡيُسۡرَىٰ

Basi chitun'jepepachisye litala lyakwalukangana (lyakutendela yambone).

Ayah: 8

وَأَمَّا مَنۢ بَخِلَ وَٱسۡتَغۡنَىٰ

Nambo mundu jwachatende ubayili ni kuliona kusichila.

Ayah: 9

وَكَذَّبَ بِٱلۡحُسۡنَىٰ

Ni kanila yambone nnope (yaakajiile kuipata akatole).

Ayah: 10

فَسَنُيَسِّرُهُۥ لِلۡعُسۡرَىٰ

Basi chitun'jepepachisye litala lyausito (lyakutendela yakusakala).

Ayah: 11

وَمَا يُغۡنِي عَنۡهُ مَالُهُۥٓ إِذَا تَرَدَّىٰٓ

Soni ngasichija kunkamuchisya chipanje chakwe ndema jagwila (ku Moto).

Ayah: 12

إِنَّ عَلَيۡنَا لَلۡهُدَىٰ

Chisimu Kukwetu nikwachili chongolo.

Ayah: 13

وَإِنَّ لَنَا لَلۡأٓخِرَةَ وَٱلۡأُولَىٰ

Soni chisimu Uwwe ni twachinsyene Akhera ni Duniya.

Ayah: 14

فَأَنذَرۡتُكُمۡ نَارٗا تَلَظَّىٰ

Basi nguntetela ya Moto waukolela (mwamachili).

Ayah: 15

لَا يَصۡلَىٰهَآ إِلَّا ٱلۡأَشۡقَى

Ngaaja kuwujinjila ikaŵeje jwakusakalilwa nnope.

Ayah: 16

ٱلَّذِي كَذَّبَ وَتَوَلَّىٰ

Ajula jwaakuŵa nkukanila ni kusyulula.

Ayah: 17

وَسَيُجَنَّبُهَا ٱلۡأَتۡقَى

Ni takaŵambasyidwe nao mundu jwawoga kusyene (wakun'jogopa Allah).

Ayah: 18

ٱلَّذِي يُؤۡتِي مَالَهُۥ يَتَزَكَّىٰ

Ajula jwaakutola chipanje chakwe pakuliswejesya.

Ayah: 19

وَمَا لِأَحَدٍ عِندَهُۥ مِن نِّعۡمَةٖ تُجۡزَىٰٓ

Soni pangali kwa jwalakwe jwalijose jwaŵantendele yaukoto yaikuŵa ili nkuusyidwa.

Ayah: 20

إِلَّا ٱبۡتِغَآءَ وَجۡهِ رَبِّهِ ٱلۡأَعۡلَىٰ

Ikaŵeje (jukutola) pakusachilila Ngope ja M’mbujeegwe (Allah) Jwapenani kusyene (kuti jukajione ku Akhera).

Ayah: 21

وَلَسَوۡفَ يَرۡضَىٰ

Ni juchija kusengwa.