Traduzione dei significati Sura Al-Balad - Traduzione in lingua yao - L'Enciclopedia del Nobile Corano

Al-Balad

Versetto: 1

لَآ أُقۡسِمُ بِهَٰذَا ٱلۡبَلَدِ

Nguulumbila awu musi (wa Maaka).

Versetto: 2

وَأَنتَ حِلُّۢ بِهَٰذَا ٱلۡبَلَدِ

Soni mmwe (Muhammadi ﷺ) tinchiŵa ŵakundisyidwa (kuputa ngondo) mu wele musiwu.

Versetto: 3

وَوَالِدٖ وَمَا وَلَدَ

Ni ngullumbila soni nangolo ni uŵelesi wajuŵeleche.

Versetto: 4

لَقَدۡ خَلَقۡنَا ٱلۡإِنسَٰنَ فِي كَبَدٍ

Chisimu pamasile patun'gumbile mundu m’matabu.

Versetto: 5

أَيَحۡسَبُ أَن لَّن يَقۡدِرَ عَلَيۡهِ أَحَدٞ

Ana juganichisya yanti pangali ŵampaka ankombole (kumpa ilagasyo)?

Versetto: 6

يَقُولُ أَهۡلَكۡتُ مَالٗا لُّبَدًا

Jukuŵecheta (mwakutwanga kuti): “Njonasile yipanje yejinji (kuti Usilamu usilale).”

Versetto: 7

أَيَحۡسَبُ أَن لَّمۡ يَرَهُۥٓ أَحَدٌ

Ana juganichisya kuti pangali ŵaakun'bona?

Versetto: 8

أَلَمۡ نَجۡعَل لَّهُۥ عَيۡنَيۡنِ

Ana nganitun'gumbila meso gaŵili (gajukulolela)?

Versetto: 9

وَلِسَانٗا وَشَفَتَيۡنِ

Ni lulimi kwisa soni ngomo siŵili (syajukuŵechetela)?

Versetto: 10

وَهَدَيۡنَٰهُ ٱلنَّجۡدَيۡنِ

Ni tun’jongolele matala gaŵili (lyambone ni lyakusakala, kuti jusagule lyajukusaka).

Versetto: 11

فَلَا ٱقۡتَحَمَ ٱلۡعَقَبَةَ

Ana pakwete pajujesile litala lyamwitumbi (lyalikam’bikasye ku Mbepo)?

Versetto: 12

وَمَآ أَدۡرَىٰكَ مَا ٱلۡعَقَبَةُ

Ana ni chichi champaka chimmanyisye ya litala lyamwitumbi?

Versetto: 13

فَكُّ رَقَبَةٍ

(Litala lyamwitumbi nimasengo gambone nambo gakunonopa, mpela): gopola kapolo.^[1]

(90:1) Akusimulila Abȗ Hurairah رضى الله عنه yanti: Ntume ﷺ jwatite: “Mundu jwalijose jwagopwele kapolo jwachisilamu, Allah tachin’jokola (nkugopola kapolojo) ku Moto (wa Jahannama), chiŵalo chilichose cha jwalakwejo ligongo lya chiŵalo chilichose cha kapolo jwaŵan’gopwele jula.” (Swahîh Al-Bukhârî, Hadith No. 2381. Aji Hadisiji jigumbalichisya ukoto wagopola kapolo, mpela mwajiŵechetele Ȃya ja (90:13). Ayi ikulosya kuti Usilamu ni wawayiche kukumasya ukapolo wamundu kwa mundu n’jakwe, nambo kuti mundu juŵe kapolo jwa Allah pe basi. Sano jwaakwaaputa ngondo Asilamu pakusaka kumasya Usilamuo, jwele komboleka kunkamula nikuŵa kapolo jwetu, ligongo jukanile kuŵa kapolo jwa Allah.

Versetto: 14

أَوۡ إِطۡعَٰمٞ فِي يَوۡمٖ ذِي مَسۡغَبَةٖ

Kapena kupeleka yakulya palisiku lyasala.

Versetto: 15

يَتِيمٗا ذَا مَقۡرَبَةٍ

(Kumpa) jwawina jwapaulongo.

Versetto: 16

أَوۡ مِسۡكِينٗا ذَا مَتۡرَبَةٖ

Kapena masikini jwaluwunduwundupe (ligongo lyakulaga nnope).

Versetto: 17

ثُمَّ كَانَ مِنَ ٱلَّذِينَ ءَامَنُواْ وَتَوَاصَوۡاْ بِٱلصَّبۡرِ وَتَوَاصَوۡاْ بِٱلۡمَرۡحَمَةِ

Soni nikuŵa (nkutola yakulyajo) jumpepe mwa aŵala ŵaakulupilile, ni kulimbikasyanaga ya kupilila soni ni kulimbikasyanaga ya kutendelana chanasa.

Versetto: 18

أُوْلَٰٓئِكَ أَصۡحَٰبُ ٱلۡمَيۡمَنَةِ

Ŵanganyao niŵandu ŵakun'dyo (ŵali ŵambone).

Versetto: 19

وَٱلَّذِينَ كَفَرُواْ بِـَٔايَٰتِنَا هُمۡ أَصۡحَٰبُ ٱلۡمَشۡـَٔمَةِ

Nambo ŵandu ŵaagakaaniile ma Ȃya Getu ŵanganyao niŵandu ŵakunchiji (ŵali ŵakusakala).

Versetto: 20

عَلَيۡهِمۡ نَارٞ مُّؤۡصَدَةُۢ

Kwaŵanganyao kuchiŵa kwana Moto Wakuunichila ni kutika (wangali pakopochela).